Вершы Надзеі Парчук

Добры дзень, дарагая рэдакцыя газеты «Вместе»! З надыходзячым Вас Новым годам і Калядамі! Хай шчасна і хораша Вам святкуецца і жывецца! Дай Бог, каб гэтыя зімовыя святы не раз паўтараліся ў Вашым жыцці, здзейсніліся ўсе Вашыя задумы!

З павагай, Надзея Парчук

* * *

Звысоку, сілач, на людзей не глядзі,

бо сіла з гадамі знікае.

За немач ты брата свайго не судзі:

ён немаччу ўсім памагае.

Ён словам высокім бліжэй

да нябёс,

і тыя яго добра чуюць.

А ты не прымаеш святое ўсур’ёз,

не ўторыш малітву святую.

Ты сілай сваёю слугуеш сабе,

не думаеш больш пра нікога,

а брат за цябе і за іншых паспеў

і сёння – укленчыць прад Богам.

Ты нават ніколі не думаў аб тым:

завошто твой братка калека?

А гэта таму, каб здаровым быў ты,

меў сэрца й душу чалавека…

 * * *

Я памалюся раніцай святой…

Ўзышла зара

над роднай Беларуссю –

ружовай кветкай сонца расцвіло.

Я зноўку ім удзячна памалюся –

за мірны дзень, за Божае святло.

Са шчырых слоў я новую малітву

уголас зноўку выдыхну – у свет:

благаславі, Гасподзь, маю палітру,

благаславі пакінуць добры след.

Я памалюся Высям і Блакіту

за ўваскрэслы ранак над зямлёй

і шапаткому залатому жыту

я памалюся раніцай святой…

 * * *

Не будзь бяздушным, чалавек,

бо ж ты з душою нарадзіўся.

Каб сын табою ганарыўся,

не будзь бяздушным, чалавек.

Чаго над слабым чыніш здзек?

Не апраўдаешся на высях…

Не будзь бяздушным, чалавек,

бо ж ты з душою нарадзіўся.

  * * *

Не шкадуйце прыгожых слоў –

ні сябрам, ні знаёмым людзям;

ці то свята, ці шэры будзень –

не шкадуйце прыгожых слоў.

Гаварыце іх зноў і зноў –

іх замнога ніколі не будзе.

Не шкадуйце прыгожых слоў –

ні сябрам, ні знаёмым людзям.